પ્રેમશંકર ભટ્ટ ~ રસરંગની છલકે છાબ

*ખેલો હો, રસિયા*

રસરંગની છલકે છાબ,
ખેલો હો, રસિયા! ફાગ! રસરંગની.

કલિ કલિ પર મધુકર ગુંજે કોકિલ બંસી બજાવે;
મલયાનિલની પાંખ પલાણી પરાગ વસંત વધાવે.

ફૂલ્યો ફાગણ, ને ધરતીએ રંગ કેસરી ચોળ્યો;
હૈયેવાટકડે મેંયે તે પ્રીતરંગને ઘોળ્યો!

પ્રણયસિતારી બજી મધુરું, સચરાચર પુલકાવે;
અણદીઠી, અણતોષી ઝંખા અંતરને છલકાવે.

હૈયાનું આસન છે સૂનું, પિયુ ચરણરજ પાડો;
ભવભવની હું ઘેલી ઝંખું મીટ નેહની માંડો.

~ પ્રેમશંકર ભટ્ટ (30.8.1814 – 30.7. 1976)

*****