🔆સરયૂ પરીખ ~ નૈન આંસુ લૂછીને🔆 -

*અલક ચૂમી ગયું*

નૈન આંસુ લૂછીને ઊભી ઉંબર બહાર,
અનઘ આનંદ ઉમંગ છે હૈયાના હાર.
રે ધરિત્રી ને અંબરના ઊઘડતાં દ્વાર,
અહો! આશાના ઓરડે આવ્યો ઉજાર.

બસ, દૃષ્ટાની  હાજરી છે, ચિંતા  નથી,
કોઈ  વાવડ  વિચારની   મહંતા નથી.
રીસ વ્યાકુળ આકાંક્ષાનું  લાંગર નથી,
દિલ   ડેલીમાં  દર્દીલા   દસ્તક    નથી.

પર્ણ પર્ણને પળોટતો શ્રાવણ આવ્યો,
અંગ અંગને મલાવતો ફાગણ આવ્યો
પંખ પંખને હુલાવતો સારસ આવ્યો,
પંથ પંથને વળોટતો સાજન આવ્યો.

જરા સંકોરી વાટ ને સુવર્ણો અજવાસ,
અષ્ટ કોઠા પ્રદીપ્ત, સુશોભે આવાસ;
રંજિત વિશ્વાસ લહે પુલકિત આ શ્વાસ,
અલક ચૂમી ગયું તેનો અંકિત આભાસ.

~ સરયૂ પરીખ

🔆સરયૂ પરીખ ~ નૈન આંસુ લૂછીને🔆