🔆શયદા ~ અધિક છે વેદથી🔆

અધિક છે વેદથી પણ જ્ઞાનનો વિસ્તાર આંસુમાં,
છુપાયો છે છૂપી રીતે જગત-કિરતાર આંસુમાં.

ક્યહીં આનંદથી ઊભરે, ક્યહીં પર શોકથી વહેતાં,
તરે છે ને ડૂબે છે આ સકળ સંસાર આંસુમાં.

ભૂમિ, આકાશ ને પાતાળમાં પણ ધૂમ છે એની,
ખબર નહોતી હશે આવી અસર બે-ચાર આંસુમાં.

હજારો આશ અંતરની વસી છે બુંદ પાણીમાં,
હું એનો આ જ શોધું છું ડૂબીને સાર આંસુમાં.

હ્રદય જે બા’ર આવે છે હશે એમાં હ્રદયમૂર્તિ,
જરા તું ધ્યાનથી જો તો ખરો પળવાર આંસુમાં.

વ્યથા એને ન થાયે એ જ ચિંતા થાય છે એથી,
હ્રદયનો શોક ચમકે છે બની શણગાર આંસુમાં.

લડે છે હર ઘડી આશા નિરાશા મુજ હ્રદયમાંહી,
કરે છે બા’ર આવીને પરસ્પર પ્યાર આંસુમાં.

નથી નિશ્વાસમાં ‘શયદા’, નથી મારા તડપવામાં,
કથા મારા જીવનની છે ફક્ત બે-ચાર આંસુમાં

‘શયદા’ ~ (24.10.1892 – 31.5.1962)