🔆રાજેન્દ્ર શુક્લ ~ ઊંટ ભરીને આવ્યું🔆

ઊંટ ભરીને આવ્યું રે અંધારું લ્યો,
આ પોઠ ભરીને આવ્યું રે અંધારું લ્યો…

કોઈ લિયે આંજવા આંખ,
કોઈ લિયે માંજવા ઝાંખ;
અમે તે ઉંબરમાં ઉતરાવ્યું રે અંધારું લ્યો…
અમે તો આંગણમાં ઓરાવ્યું રે અંધારું લ્યો,
ઊંટ ભરીને…..

એના અડ્યા આભને છોડ;
એવા અડ્યાં આભને કોડ –
અમે તો મૂઠી ભરી મમળાવ્યું રે, અંધારું લ્યો,
અમને ભોર થતાં લગ ભાવ્યું રે, અંધારું લ્યો…
ઊંટ ભરીને…..

~ રાજેન્દ્ર શુકલ (12.10.1942)

જન્મદિવસે કવિને સ્નેહવંદન.

@@@

મનને સમજાવો નહીં કે મન સમજતું હોય છે,
આ સમજ, આ અણસમજ, એ ખુદ સરજતું હોય છે.

છે ને કવકોલાહલે આ સાવ મૂગું મૂઢ સમ,
એકલું પડતાં જ તો કેવું ગરજતું હોય છે!

એક પલકારે જ જો વીંધાય, તો વીંધી શકો,
બીજી ક્ષણ તો એ જ સામા સાજ સજતું હોય છે.

એ જ વરસે વાદળી સમ ઝૂકતું આકાશથી,
એ જ તો મોતી સમું પાછું નીપજતું હોય છે.

ઓગળે તો મૌનથી એ ઓગળે ઝળહળ થતું,
શબ્દનું એની કને કૈં ક્યાં ઊપજતું હોય છે !

~ રાજેન્દ્ર શુક્લ

🌹મિત્રો, ‘કાવ્યવિશ્વ’નો પાંચમો જન્મદિવસ (9.10.2000) છે. આપ સૌના સાથ સહકારથી, ‘કાવ્યવિશ્વ’ પાંચ વર્ષ પૂરાં કરીને છઠ્ઠા વર્ષમાં પ્રવેશી ગયું છે. આજ સુધીમાં કવિતા અને કવિતા અંગેની મુકાયેલી કુલ પોસ્ટ 5297, દોઢ લાખથી વધારે વિઝીટર્સ અને ત્રણ લાખથી વધારે વ્યુઝ આ સાઇટને મળ્યા છે. કાવ્યપ્રેમીઓના આટલા ઉમદા સહકાર બદલ દિલથી આભારી છું. 🙏