🔆દલપત પઢિયાર ~ ચાલુ ચોમાસે🔆

ચાલુ ચોમાસે
નવેરામાં
નવા આંબા ઉગ્યા હશે…

આ લ્યો
ઊગેલા ગોટલાને ઘસી ઘસી
પિપૂડી વગાડવાની ઉંમર તો
આખરે
થડિયું થઈને રહી ગઈ
અમને
ફૂટવાનો અનુભવ ક્યારે થશે ?

~ દલપત પઢિયાર (11.10.1950)

આ અનુભૂતિ માનવીની પોતાની ચેતનાના સ્તર મુજબ થાય. ‘ફૂટવા’ની પ્રક્રિયા ગહન છે અને ચમત્કારી પણ. કોઈક એક પળમાં આ પામી શકે અને બાકી જન્મારા વીતી જાય તોય એ તરફ દૃષ્ટિ પણ ન જાય! સામાન્ય માનવી માટે આ ‘ફૂટવા’ તરફ સમજણ જાગે તોય ઘણું છે.

કવિતામાં જરા ઊંડી વાત છે. આંખ સામે દૃશ્ય નવા આંબા ઊગવાનું, એની કલ્પનાનું છે, જે પ્રતિક છે. પણ આગળ જતાં, ‘પીપૂડી વગાડવાની ઉંમર થડિયું થઈને રહી ગઈ, અમને ફૂટવાનો અનુભવ ક્યારે થશે?’ અહીં કાવ્યત્વ અને અધ્યાત્મ એકીસાથે ખૂલે છે. ઉંમરના એક પડાવે, કશેક પહોંચવાની, કશુંક પામવાની વૃત્તિ જાગે છે અને જો એ ઉછીની ન હોય તો અંદર મૂળ ઊંડા ઉતારતી જાય છે. આ જન્મે બીજ વવાયું હોય તો આ જ જન્મે, બીજા કે પછીના કોઈ જન્મમાં એ ‘પામવાની’ ક્રિયા થઈ શકે.  

કવિ પોતે રવિભાણ સંપ્રદાયની કહનવાડી શાખાની ગાદીનાં સાતમી પેઢીના ગાદીપતિ તરીકે બિરાજમાન છે. અધ્યાત્મ એમના લોહીમાં અને એટલે કવિતામાં વણાયેલા છે. મધુર, રસલીન કરી દેતાં ભજનો ગાતાં આ કવિ ગાદીપતિ તરીકે રાતોની રાતો ભજન ગાવામાં રમમાણ રહી અનેક અનુભૂતિઓ પામ્યા હશે.

આવા શુદ્ધાત્મા કવિને જન્મદિવસે શત શત વંદન.

🌹મિત્રો, ‘કાવ્યવિશ્વ’નો પાંચમો જન્મદિવસ (9.10.2000). આપ સૌના સાથ સહકારથી, ‘કાવ્યવિશ્વ’ પાંચ વર્ષ પૂરાં કરીને છઠ્ઠા વર્ષમાં પ્રવેશી ગયું છે. આજ સુધીમાં કવિતા અને કવિતા અંગેની મુકાયેલી કુલ પોસ્ટ 5297, દોઢ લાખથી વધારે વિઝીટર્સ અને ત્રણ લાખથી વધારે વ્યુઝ આ સાઇટને મળ્યા છે. કાવ્યપ્રેમીઓના આટલા ઉમદા સહકાર બદલ દિલથી આભારી છું. 🙏