🔆કૃષ્ણ દવે ~ એક હતો અંગુઠો🔆 -

*એકલવ્યનું કોણ ?*

એક હતો અંગૂઠો એ પણ માંગી બેઠા દ્રોણ.
એકલવ્યનું કોણ ? બોલો એકલવ્યનું કોણ ?

આ લીલાંછમ વૃક્ષો ફાલ્યાં સત્તાથીય વિશેષ,
શ્વાન નહીં પણ ભસ્યો હશે ત્યાં ઈર્ષ્યાનો પરીવેશ,
મ્હેલોથીયે વધુ વૈભવી આ નાનકડું ભોણ !
એકલવ્યનું કોણ ?

ભોળાં હરણાં ને ભોળાં છે આ ઝરણાંનાં નીર,
એથીયે પણ ભોળું નીસર્યું આ વનવાસી તીર,
લોટ બાંધવા કોઈ ન માંગે કદી રક્તનું મોણ !
એકલવ્યનું કોણ ?

હજુય ક્યાં લગ માંગ્યા કરશો આમ તમે અંગૂઠા?
માંગી માંગીને ય તમારા હાથ થયા છે ઠૂંઠા,
ફરી ફરી વર્તુળ શા માટે ? રચો કદી ષટ્કોણ.
એકલવ્યનું કોણ ?

~ કૃષ્ણ દવે

શિક્ષણ અને મોટાભાગે શિક્ષકો બાળકના વેરી બન્યા છે ત્યારે આ ગીત કેટલી વેધક અસર છોડી જાય છે ! સંદર્ભ ભલે પૌરાણિક રહ્યો, આજે પણ આ વાત એટલી જ સાચી છે.

🙏🏻આપ ‘કાવ્યવિશ્વ’ના નિયમિત મુલાકાતી છો એનો આનંદ છે. સાઇટના આ નવા સ્વરૂપમાં આપને ફરી subscribe કરવાનું રહેશે. એટલો સહકાર જરૂર મળશે. આભાર. આપના પ્રતિભાવો આનંદ અને ઉત્સાહ આપશે. આભાર. – સંપાદક🙏🏻