🔆ઘનશ્યામ ઠક્કર ~ મળવાનું મન🔆

મળવાનું મન પહોંચ્યું જોજનવા દૂર તોય ખેંચાતી જાઉં છું પછીતે!
ગોકુળમાં ઓળખેલ શ્યામ, તને દ્વારિકામાં ઓળખી શકીશ કઈ રીતે?

ઝાંઝર-શાં ઝણઝણતાં ડોલતાં કદંબ, આજ ડોલે તો રણકે છે હીરા!
વનરા તે વન મહીં કાંટાળી બોરડીને ભેટતાંય પડતા’તા ચીરા?
કોને કહૌં, સમણામાં તારા એ આરસના ચોકમાંય ચાલતાં શું વીતે?

તારી સંગાથ ગ્રહ્યો ગોવર્ધન, આજ તારા પીંછાનો ભાર પણ ખમાય ના
ધગધગતો હેમરસ વહેતો દેખાય એવી જમનાને કાંઠે બેસાય ના!
છેવટે જો રણશિંગાં ફૂંકવાં હતાં તો કેમ વીંધી’તી વાંસળીના ગીતે?

ગોકુળમાં ઓળખેલ શ્યામ તને દ્વારિકામાં ઓળખી શકીશ કઈ રીતે?
મળવાનું મન પહોંચ્યું જોજન—વા દૂર તોય ખેંચાતી જાઉં છું પછીતે.

ઘનશ્યામ ઠક્કર (19.9.1946)

જન્મ ખેડા જિલ્લાના દેથલી ગામે.

૧૯૮૩થી અમેરિકાના ટેક્સાસ રાજ્યમાં રહે છે. ‘ભૂરી શાહીના કૂવાકાંઠે’ એમનો કાવ્યસંગ્રહ.

ગીત એમનો સર્જનવિશેષ.

🙏🏻આપ ‘કાવ્યવિશ્વ’ના નિયમિત મુલાકાતી છો એનો આનંદ છે. સાઇટના આ નવા સ્વરૂપમાં આપને ફરી subscribe કરવાનું રહેશે. એટલો સહકાર જરૂર મળશે. આભાર.  આપના પ્રતિભાવો આનંદ અને ઉત્સાહ આપશે. આભાર. – સંપાદક🙏🏻