🔆કુમાર જૈમિનિ શાસ્ત્રી ~ સ્વપ્ન મારાં🔆 -

સ્વપ્ન મારાં માત્ર મારા ગજા ઉપર રહ્યાં
ભોંય પર રહ્યા અમે એ છજા ઉપર રહ્યાં

સાંજ પણ નક્કી કરી, સ્થાન પણ નિયત કર્યું,
પણ પ્રણયના દેવતાઓ રજા ઉપર રહ્યા

કંઈ ખુશી આવીને ગઈ પણ મને મળી નહીં,
તો અમે નિર્ભર અમારી મજા ઉપર રહ્યા

કંઈક ઝંઝાવાત ત્યાં આવતા જતા રહ્યા,
દેવ નિજ સ્થાને રહ્યા, એ ધજા ઉપર રહ્યા…

~ કુમાર જૈમિનિ શાસ્ત્રી

વાત તો પ્રણયની પીડાની છે પણ કવિએ પીડાને હળવાશમાં વહેવડાવી છે. પહેલા અને બીજા શેરની બીજી પંક્તિઓમાં કવિએ પોતાની જ મજાક કરી છે.
‘ભોંય પર રહ્યા અમે એ છજા ઉપર રહ્યાં’ અને
‘પણ પ્રણયના દેવતાઓ રજા ઉપર રહ્યા’

ત્રીજો શેર પોતાને જાળવી લેવા અંગેનો છે. તો ચોથા શેરની બીજી પંક્તિ ફરી પોતાને ઉડાવે છે.
‘દેવ નિજ સ્થાને રહ્યા, એ ધજા ઉપર રહ્યા…’

આ વિશ્વમાં કોઈને પોતાનું ધાર્યું મળ્યું હોય, ધાર્યા સમયે મળ્યું હોય, ધારી રીતથી મળ્યું હોય, ધાર્યા સ્વરૂપે મળ્યું હોય એવા માનવીને દીવો લઈને શોધવા જવું પડે. આ સત્ય છે. જીવનને દેવદાસ બનીને રહેવું કે પોતાની મોજ શોધી લેવી એના વિકલ્પ મળે છે. આ સમય અને આ પેઢી ઘણી વ્યવહારુ છે. આમેય દેવદાસ નવલકથામાં જ શોભે ! જીવનમાં એવા પાત્રો જવલ્લે જ મળે. ત્યારે કવિનું આ હળવું પાસું ઘણું સ્પર્શી જાય છે.

🙏🏻‘કાવ્યવિશ્વ’ના આ નવા સ્વરૂપમાં આપને ફરી subscribe કરવાનું રહેશેજી. એટલો સહકાર જરૂર મળશે. આભાર. આપના પ્રતિભાવો આનંદ અને ઉત્સાહ આપશે. આભાર.🙏🏻