🔆હરકિસન જોષી ~ જઈએ ક્યાં🔆 -

જઈએ ક્યાં ને કોને મળીએ ?
બહેતર છે કે પાછા વળીએ.

રોજ અનિદ્રા આવી પીડે,
કહે, સ્વપ્નમાં ક્યાંથી મળીએ !

સૂક્યા તો પથ્થર થઈ બેઠા,
બરફ જેમ ના તો ઓગળીએ !

અંધકારને અંધકાર છે,
કંઈ ના સૂઝે, કંઈ ન કળીએ !

રણથી ભાગી ઘર આવ્યા તો,
મૃગજળ દોડી આવ્યા ફળિયે !

મોજાંને નાહક ઉથલાયો,
મોતી તો પથરાયા તળિયે !

પુષ્પ લૂંટાતા જોઈ કુંવારી –
મ્હેક લપાઈ કળીએ કળીએ !

~ હરકિસન જોષી (31.8.1940 – 12.10.2021)

🙏🏻આપ ‘કાવ્યવિશ્વ’ના નિયમિત મુલાકાતી છો. ક્યારેક પ્રતિભાવ પણ લખો અને આપ આ સાઇટ subscribe કરો એવી અપેક્ષા. આભાર. 🙏🏻

🔆હરકિસન જોષી ~ જઈએ ક્યાં🔆