🔆ઝવેરચંદ મેઘાણી ~ ભીંતે ઝૂલે છે તલવાર🔆

ભીંતે ઝૂલે છે તલવાર બાપૂજી કેરી ભીંતે ઝૂલે રે.
ભેટ્યે ઝૂલે છે તલવાર, વીરાજી કેરી ભેટ્યે ઝૂલે રે.

મારા બાપૂને બ્હેન ! બે-બે કુંવરિયા બે વચ્ચે પાડ્યા છે ભાગ
હાં રે બ્હેની ! બે વચ્ચે પાડ્યા છે ભાગ….

મોટે માગી છે મો’લ મ્હેલાતું વાડિયું
નાને માગી છે તલવાર…..

મોટો મ્હાલે છે મો’લ મેડીની સાયબી
નાનો ખેલે છે શિકાર…..

મોટો ચડિયો છે કાંઈ હાથી-અંબાડીએ
નાનેરો ઘોડે અસવાર…..

મોટો કાઢે છે રોજ કાવા-કસૂંબલા
નાનેરો ઘૂમે ઘમસાણ…..

મોટો પોઢે છે લાલ રંગીલ ઢોલીએ
નાનો ડુંગરડાની ધાર…..

મોટો મઢાવે વેઢ વીંટી ને હારલા
નાનો સજાવે તલવાર…..

મોટાને સોહે હીર-ઝરિયાની આંગડી
નાનાને ગેંડાની ઢાલ……

મોટો સંતાય સુણી શત્રુના રીડિયા
નાનેરો દ્યે છે પડકાર……

મોટો ભાગ્યો છે સેન શત્રુનાં ભાળતાં
નાનેરો ઝીંકે છે ઘાવ……

મોટો જીવ્યો છે પાય શત્રુના પૂજતો
નાનેરો સૂતો સંગ્રામ……

મોટે રે માડી તારી કુખો લજાવી
નાને ઉજાળ્યા અવતાર…..

મોટાના મોત ચાર ડાઘૂડે જાણિયાં
નાનાની ખાંભી પૂજાય….

~ ઝવેરચંદ મેઘાણી

🙏🏻‘કાવ્યવિશ્વ’ના આ નવા સ્વરૂપમાં આપ ફરી subscribe કરશોજી. આપના પ્રતિભાવો આનંદ અને ઉત્સાહ આપશે. આભાર.🙏🏻