🔆ગની દહીંવાલા ~ બહુરૂપી ! તમારાં નયનોનાં🔆 -

બહુરૂપી ! તમારાં નયનોનાં બે રૂપ બરાબર લાગે છે,
મીંચાય તો બીડાયેલ કમળ, ઊઘડે તો પ્રભાકર લાગે છે.

છે પુણ્ય પ્રતાપ મહોબ્બતના, પથ્થરમાં જવાહર લાગે છે,
હું લોકને નિર્ધન લાગું છું, દિલ મુજને તવંગર લાગે છે.

લો ટૂંકમાં દોરી દેખાડું, મારી આછી જીવનરેખા,
તે વાત ખરી માની લઉં છું, જે જૂઠ સરાસર લાગે છે.

પડતીમાં પડે છે જે મુજ પર ઉત્કર્ષ ગણી લઉં છું તેને,
તે મારા જીવનનું ઘડતર છે, જે ચોટ હૃદય પર લાગે છે.

તોફાનમાં મુજને જોનારો ! એ દોષ છે તારી દૃષ્ટિનો,
નૌકા તો હિંડોળે હીંચે છે, તોફાનમાં સાગર લાગે છે.

માનું છું જીવનના ઉંબર પર વેરાય કંઈ પ્રીતિ-પુષ્પો,
સત્કાર યુવાનીનો એ વિણ મુજને તો અનાદર લાગે છે.

દુનિયામાં ‘ગની’, વ્યાકુળ દિલને ઠરવા ન મળ્યો કોઈ આરો,
આ ફરતી પૃથ્વી પણ મારા તકદીરનું ચક્કર લાગે છે.

~ ગની દહીંવાલા (17.8.1908 – 5.3.1987)

*****

ખાસ :

🙏🏻આપ ‘કાવ્યવિશ્વ’ના નિયમિત મુલાકાતી છો. આપ આ સાઇટ subscribe કરો એવી અપેક્ષા. જો અગાઉ આપે subscribe કર્યું હશે તો ‘કાવ્યવિશ્વ’ના આ નવા સ્વરૂપમાં આપ ફરી subscribe કરશોજી. ઉપર જ જમણી બાજુ subscribe લખ્યું છે ત્યાં ક્લિક કરતાં ઈમેલ લખવાનું ઓપ્શન મળશે. આભાર🙏🏻

Anonymous

17/08/2025 at 12:27 pm

વાહ, ગઝલ અને નઝમ‌ બંને માણવાની મજા પડી.

Kaushal

17/08/2025 at 1:37 pm

ખૂબ સરસ

રેણુકા દવે

17/08/2025 at 1:45 pm

વાહ ભાઈ વાહ…ગીત અને ગઝલ બંને પરસ્પર હરીફાઈ કરે તેવાં.
શબ્દો જાણે કે જે તે વાતના ફોટોગ્રાફ સાથે આવ્યા હોય એટલી સહજતાથી ભાવ સાકાર થાય છે.
આ સૌને લીધે જ આપણી ભાષા સમૃદ્ધ છે.
ખૂબ ખૂબ અભિનંદન લતાબેન..આપણા વારસાનું આટલી સરસ રીતે જતન કરવા માટે.