🔆જિતેન્દ્ર જોશી ~ વગડાની તોલે🔆

વગડાની તોલે ના કરશો ઘનશ્યામ ! તમે વણાજોતાં ગોકુળના મૂલ
પાવાની રમઝટમાં બંસીના સૂર અહીં પળભરમાં થઈ જાશે ડૂલ.

વનરાવન જેવા છે બાજરીના મોલ, અહીં મોરપીંછ જેવા છે ડૂંડા
આખીયે યમુનાના ખળખળતા નીર અહીં આંખોમાં છલકે છે ઊંડા,
ગોવર્ધન કરતાં પણ ઊંચી છે વાડ,, ઉપર ડોલે છે બાવળના ફૂલ
પાવાની રમઝટમાં બંસીના સૂર અહીં પળભરમાં થઈ જાશે ડૂલ…….

માટીના દોણામાં રાંધીને ભોગ અમે રોટલાના બાંધ્યા છે ભાથાં
સુદર્શન કરતાં પણ ચડિયાતા શ્યામ અહીં પાવડા ને ત્રિકમના હાથા,
ઘરઘરમાં રાધા છે અહીંયા ઘનશ્યામ, અહીં આવવાની કરશો ના ભૂલ
પાવાની રમઝટમાં બંસીના સૂર અહીં પળભરમાં થઈ જાશે ડૂલ……

~ જિતેન્દ્ર જોશી