🔆બકુલેશ દેસાઈ ~ ત્રણ ગઝલ🔆 -

અહીં કાચ ને પથ્થરો પણ અહીં છે
બરડ શ્વાસનાં ઝુમ્મરો પણ અહીં છે.

કડડભૂસ ગીતો તણા કાંગરા અહીં
બચેલો મધુર અંતરો પણ અહીં છે.

ટહુકવાને ઉત્કંઠ જોકે મયૂરો
ચૂક્યા હોય એ અવસરો પણ અહીં છે.

ખબર પણ પડે ના અને ખોઈ બેસો
પળો ચોરતા તસ્કરો પણ અહીં છે.

અહીં ખારપાટી ભૂમિ છે, ‘બકુલેશ’
કહો, સંસ્મરણનો ઝરો પણ અહીં છે.

~ બકુલેશ દેસાઈ

*****

બકુલેશ દેસાઈ ~ આદરી છે અને અધૂરી છે

આદરી છે અને અધૂરી છે
જાતની જાતરા ક્યાં પૂરી છે ?

જીવવા યાદ બહુ જરૂરી છે
એટલે મેં સતત વલૂરી છે

રાહ જોવામાં શૂરીપૂરી છે
મારી આંખો ગજબની નૂરી છે !

ધૂળ શ્રદ્ધા અને સબૂરી છે ?!
લાગે છે – ભીરુતા ઢબૂરી છે !

ભાવ-સમભાવ-ધ્યેય નહિ હો તો –
જિંદગી કંઈ નથી, મજૂરી છે !

ખાસ મિત્રો છે… મોટી દહેશત છે…
રામ મુખમાં, બગલમાં છૂરી છે.

એક-માર્ગી નથી હૃદય મારું,
ચાહ પામ્યો છું… ચાહ સ્ફુરી છે.

~ બકુલેશ દેસાઈ

*****
બકુલેશ દેસાઈ ~ અલગતા જુઓ વસ્ત્ર જેવી તમારી

અલગતા જુઓ વસ્ત્ર જેવી તમારી,
અમે છુંદણા થૈ જડાયાં ત્વચા પર.

તમારું સ્મરણ થૈ જતાં માત્રમાં તો,
શીળા સ્પર્શની છે બળતરા ત્વચા પર.

સડોસડ પડે દ્રશ્યના ચાબખા ને-
વીતી જિંદગીના ઉઝરડા ત્વચા પર!

મુલાયમપણાના ગયા સર્પ સરકી…
હવે તો કરચલીની ભાષા ત્વચા પર.

નિકટતા અહીં તો ઘડી બે ઘડીની !
દિવસરાત પ્રસ્વેદી છલના ત્વચા પર.

~ બકુલેશ દેસાઈ

હરીશ દાસાણી.મુંબઈ

16/07/2026 at 8:33 am

બંને ગઝલો સુંદર છે.
અભિનંદન.
શુભેચ્છાઓ.

છબીલભાઈ ત્રિવેદી
16/07/2026 at 9:45 am

વાહ બધી ગઝલ ખુબ સરસ ખુબ ગમી અભિનંદન

Loading...

Anonymous

16/07/2026 at 11:56 am

👏👏👏👏👏🙏🙏🙏🙏🙏
ઉમદા રચનાઓ. ત્રણેય એકબીજાથી ચડે તેવી. જોરદાર

રાજેન્દ્ર ભટ્ટ

16/07/2026 at 1:42 pm

સુંદર ગઝલો અભિનંદન🎉🎊

Saryu Parikh

16/07/2026 at 6:45 pm

ભાવ-સમભાવ-ધ્યેય નહિ હો તો –
જિંદગી કંઈ નથી, મજૂરી છે !
saras.

'સાજ' મેવાડા

16/07/2026 at 10:31 pm

ખૂબ સરસ ગઝલો

🔆બકુલેશ દેસાઈ ~ ત્રણ ગઝલ🔆