🔆કાવ્યસર્જનની પ્રક્રિયા ~ એમી લોવેલ🔆 -

‘કવિતા કેવી રીતે સર્જાય છે? એ પ્રશ્નના જવાબમાં મારો સહજસ્ફુરિત ઉત્તર તદ્દન સાદો છે : ‘હું જાણતી નથી.’ પ્રશ્ન મને પુછાયો તેથી તે માત્ર મારી કવિતાને નિર્દેશીને જ પુછાયો હોવા છતાં, જવાબમાં એથી કોઈ ફરક પડતો નથી. કેમ કે તે કેવી રીતે સર્જાય છે તે વિશે હું જેટલું અલ્પ જાણું છું તેટલું જ બીજો કોઈ પણ જાણતો હશે. હું જે કાંઈ જાણું છું, તે તો જે જાણવું જોઈએ તેનો લાખોમો ભાગ છે. ચેતનાના સ્પર્શ આગળ અમારો સંયોગ થાય છે. અને કવિતાના ઉદયપથને સમજવા માટેનું તે નોંધપાત્ર અંતર છે…….

સાચું એ છે કે આમાં એક રહસ્ય છે અને એ અંગે કવિ જેટલો સભાન હોય છે તેટલું બીજું કોઈ હોતું નથી. કબૂલ કરીએ કે કવિ અમુક અંશે રેડિયો – એરિયલ જેવો હોય છે. તે તરંગો પર આવતા અમુક પ્રકારના સંદેશાઓ ઝીલવા સક્ષમ હોય છે. પણ તે એરિયલ કરતાં કશુંક વધુ હોય છે. કેમ કે તે આ સંદેશાઓને કાવ્યરૂપે શબ્દોની ચોક્કસ ભાતમાં પરિવર્તિત કરવા શક્તિમાન હોય છે.

(પ્રશિષ્ટ કૃતિ અને બીજા : અનુવાદ દક્ષા વ્યાસ)