ખલીલ ધનતેજવી ~ અમે અમારી રીત પ્રમાણે

🥀🥀

અમે અમારી રીત પ્રમાણે રાતોને અજવાળી છે
તમે ઘરે દીવો સળગાવ્યો, અમે જાતને બાળી છે

વાર તહેવારે જીદે ચડતી ઇચ્છાને પંપાળી છે
મનમાં ભીતર હોળી સળગે, ચહેરા પર દિવાળી છે

તમને જોઇને પલકારાની રસમ ત્યજી છે આંખોએ
જ્યારે જ્યારે નજર મળી છે ત્યારે પાંપણ ઢાળી

છાંયડે બેસી અસ્ત–ઉદયની લિજ્જત ના સમજાવ મને
માથે આખો સુરજ લઇને સાંજ બપોરે ગાળી છે

કેટકેટલી ડાળો જાતે નમી પડેલી હોય ખલિલ
જે ડાળેથી ફૂલ મેં ચુંટ્યું સૌથી ઉંચી ડાળી છે..

~ ખલીલ ધનતેજવી (12.12.1935 – 4.4.2021)