🥀 🥀
રસ્તો નથી તો કર નવી કેડી અને ચાલી નીકળ
પગપાળા તારી જાતને તેડી અને ચાલી નીકળ
જાળાં નકામા ઝાંખરા ખેડી અને ચાલી નીકળ
સંબંધ ‘ને શાખા બધું વેડી અને ચાલી નીકળ
સામે પવન તું ડગલું ભરશે ત્યાં જ લેશે ઊંચકી
લે, તોડ લખ ચોર્યાસીની બેડી અને ચાલી નીકળ
બીજી પળે આકાશ એની મ્હેકથી છલકી ઊઠે
તું રાગિણી એ લાક્ષણિક છેડી અને ચાલી નીકળ
પથ્થરમાં પણ સંવેદનાઓ ગીત તારું સ્થાપશે
અણફળ રહેલાં ઝાડ ઝંઝેડી અને ચાલી નીકળ
સમધર્મી સાથે ચાલતા નિજમાર્ગ સંભાળી રહે
એવી અડીખમ શોધી લે હેડી અને ચાલી નીકળ
સક્ષમ ચડી શકવા ન હો, હા ઝાલ એની આંગળી
પ્હોંચે પછી છોડી દે એ મેડી અને ચાલી નીકળ
~ સંજુ વાળા
ચાલી નીકળવાની વાત ખરેખર નીકળી પાડવા પ્રેરે એટલી સચોટ અને જીવંત.
‘પગપાળા’ એટલે જાતને તેડી લેવાની વાત! વાહ કવિ
ભાવકને લખ ચોર્યાસીની બેડી તોડવા સુધી પણ કવિ પહોંચાડે છે.
હિંમત ઓછી પડે તો આંગળી ઝાલવાની છૂટ પણ પછી છોડી દેવાની શરતે ! યે બાત !