🔆શિવજી રુખડા ~ ફોડ પરપોટો🔆

ફોડ પરપોટો હવે પાષાણ પર
શું ભરોસો રાખવો પોલાણ પર.

આપણે કાંઠા ઉપર છબછબ કર્યું
કેમ જાશું લ્યો હવે ઊંડાણ પર.

મૂળ કાગળ ધ્યાનમાં લીધો નહીં
ધ્યાન આપ્યું ફકત બીડાણ પર.

એટલે ભૂલા પડયા, પૂછ્યું છતાં
કોઇ દિ’ ચાલ્યા નહી પૂછાણ પર.

આમ રજકણ રોજ બમણી થાય છે
કાળજી રાખી નહીં ધોવાણ પર.

ઢાળનું કારણ બહુ ગમતુ હતું
એટલે આવી ગયા નીચાણ પર.

~ શિવજી રુખડા

જીવ્યા કરો, જીવ્યા કરો. સમજણ સાથે બારમો ચંદ્રમા રાખીને. અલબત્ત આવું છે એની ખબર નથી. સમજ વિકસાવવી જોઈએ એની પણ ખબર નથી!  કાંઠા પર છબછબિયાં કરવામાં જિંદગી ગઈ. ઊંડાણની સમજ કદી ન આવી. રસ્તો બતાવનારા મળ્યા પણ એના પર ભરોસો ના કર્યો અને ચાલતા રહ્યા, ઝાડી-ઝાંખરામાં.

મૂળ વાત છેલ્લે આવે છે. કેમ ગબડ્યા? કેમ નીચે આવી ગયા કે કેમ નીચે જ રહ્યા? તો કારણ છે કે ઢાળ ગમતો હતો. ઢળવું ગમતું હતું. અને આ ઢાળ છે જીવનની મોહ-માયા. કોણ બચે છે આનાથી? જીવાતા જીવનની કવિતા ! સચ્ચાઈનો સ્વીકાર !  

કવિની ગઝલ પર હથોટી છે એટલે રદ્દીફ કાફિયાની પ્રવાહિતા સ્પર્શે છે.  

🌸દિન વિશેષ : વર્ષા જાની, નયન પંચોલી, ભાલચંદ્ર નેમાડે🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

બાળકમાં શિસ્ત અને નિયમપાલન