🔆કૃષ્ણ દવે ~ દેડકીબાઈ🔆 -

દેડકીબાઈ

દેડકીબાઈ તો ડ્રાંઉ ડ્રાંઉ કરતાં ચાલ્યા સ્કૂલે ભણવા
એક બે ત્રણ ચાર પરપોટાને માંડ્યા એ તો ગણવા
પરપોટા તો થઈને પાછા પટપટ ફૂટી જાય
દેડકીબાઈ તો ગણતાં ગણતાં ગણતાં ઊંઘી જાય

દેડકીબાઈ તો છત્રી લઈને ચાલ્યા શોપીંગ કરવા
આકાશેથી ફર ફર ફર ફર માંડ્યા ફોરાં ખરવાં
સ્વિચ દબાવી ઝટપટ ઝટપટ છત્રી ખોલવા જાય
દેડકીબાઈની છત્રી કાગડો થઈને ઊડી જાય

દેડકીબાઈ તો વિમાનમાં બેસીને ચાલ્યા ફરવા
કાળા કાળા વાદળ આવ્યા ને એ માંડ્યા ડરવા
વિમાન રોકી આકાશે અધવચ્ચે ઉતરી જાય
મેઘધનુષની કરી લપસણી સીધા નીચે જાય

દેડકીબાઈ તો હેલ્મેટ પહેરી ચાલ્યા ઑફિસ જાવા
કાં કાં કરતાં કાગડાભાઈ તો આવ્યા એને ખાવા
સૌથી પહેલા માથું એનું ઠોલી ખાવા જાય
એમાં તો આ કાગડાભાઈની ચાંચ બુઠી થઈ જાય

~ કૃષ્ણ દવે

જુઓ આ ગીત, આ મીઠડી કેવું સરસ ગાય છે !