દેવજી મોઢા ~ ચૈતર આવ્યો

🥀🥀   

ચૈતર આવ્યો તો ચાલ મહોરીએ
આંબાની ડાળ ડાળ બેઠો છે કોળ
તો એ કોળ જેવુ જીવતરમાં ફોરીએ !

આંબો ઝીલે છે શિર તડકો સૂરજનો ને ધરતી પર પાથરતો છાંય
એનાં કુમાશભર્યા લીલુડાં પાંદ મહીં ઝળકે રતુંબડી ઝાંય!
જાણે કે ગાલ પરે છોડી ગુલાબી કોઈ ગોકુળિયા ગામની ગોરીએ !

આંબાની ડાળ વિશે ઝૂલે પવંન પેલી મંજરીઓ મ્હેક મ્હેક થાય
કોયલ આવી, રેલી પંચમના સૂર એના ગીતો મધુરવાં ગાય!
સારીયે સીમ તણી વનરાની જેમ, ચલો ! આપણેય ખેલીએ હોરીએ !

ચૈતરના આભ તળે બેસી કૌમારમાં આપણે જમાવતાં વાતો
એમાંથી પાંગરી પ્રફૂલ્લ્યો આ આપણો  આજનો હેતાળવો નાતો !
કાળની સંદૂક મહીં સચવાયા સ્મરણોને ચાલો ને આજ જરી ચોરીએ !

~ દેવજી મોઢા (8.5.1913 – 21.11. 1987)