🥀 🥀
કેટલાં વરસો અમે ખર્ચ્યાં હતાં એ દોરતાં,
ના વિચાર્યું સ્વપ્નનગરી પગતળે ધમરોળતાં?
હોય દોરામાં પડેલી કે પછી હો મન મહીં,
હર કિસમની ગ્રંથિઓ અઘરી પડે છે છોડતાં.
એટલો રીઢો હજી ન્હોતો થયો હું, યાદ છે?
તેં મને ઝડપી લીધો’તો ઊંઘ તારી ચોરતાં.
ક્યાંક આઘે કાચ તૂટે તોય ફફડું છું અહીં,
થાય છે ખટકો મને તો ફૂલ સુદ્ધાં તોડતાં.
અબઘડી બેલિફ આવી રૂબરૂ બજવી ગયો,
હાથ બહુ ધ્રૂજ્યો હતો પરબીડિયું એ ફોડતાં.
~ કિશોર જિકાદરા