*તો ચાલશે*
ઘરની સામે ઘર હશે તો ચાલશે;
સાંકડું અંતર હશે તો ચાલશે.
આંખ બોલી સાંભળે છે આંખ પણ ;
પ્રેમનું મંતર હશે તો ચાલશે.
એક વિજાણંદ ને શેણી સમું ;
ઠાવકું જંતર હશે તો ચાલશે.
વાટકી અંદર ભરી છે આ તરસ ;
એટલું સરવર હશે તો ચાલશે.
ના કદી પહોળા થયા ના સાંકડા ;
માપની ચાદર હશે તો ચાલશે.
રોજની ખાતાવહી જોવી ઘટે ;
-મેળ ત્યાં સરભર હશે તો ચાલશે.
~ શિવજી રૂખડા
રદ્દીફ ‘ચાલશે’ રાખીને કે ‘માપની ચાદર’ કહીને કવિએ શું બાકી રાખ્યું છે, એ પ્રશ્ન છે. આંખની બોલી આંખ સાંભળે કે વાટકી તરસની ભરાય કે રોજની ખાતાવહી સરભર થવાની ઝંખના વ્યક્ત થાય ત્યાં એ સમજાય છે. અને એ જ તો કવિતા છે!
***