આવ્યા રે શું કામ ?*
(દોહા-ગઝલ)
રૂની વણજું લઈ થડે, આવ્યો રે શું કામ?
ધૂપસળી મૂકી ધડે, આવ્યો રે શું કામ ?
એવી કેવી મીટ કે વચમાં આવે ઇંટ ?
આંખોને શું આવડે ? આવ્યો રે શું કામ ?
ના પરબુંનાં નીર કે ના એ ચરણામૃત,
તરસ્યું લસલસ લૈ ઘડે, આવ્યો રે શું કામ?
સબ-રસથી ચકચૂરમાં ક્યાંથી વગડે તૂર ?
કાયા જેવા કોયડે, આવ્યો રે શું કામ ?
નહિતર તું ત્રિશૂળ ને ભસ્મ જ તારું મૂળ,
લૂણે લથબથ લૂગડે, આવ્યો રે શું કામ ?
જાવું’તું દામા લગી, નિસર્યો વામા કોર,
સેંજળ ભર્યા તલાવડે, આવ્યો રે શું કામ ?
આરસને વશ ઓરડા, રૂમઝૂમતા રહેવાય,
તો વણદીઠા વાવડે, આવ્યા રે શું કામ ?
~ લલિત ત્રિવેદી
‘તરસ્યું લસલસ લૈ ઘડે’ પ્રયોગ ગમી ગયો તો ‘જાવું’તું દામા લગી, નિસર્યો વામા કોર’માં દામા અને વામાનો પ્રાસ બહુ સહજ અને સુંદર લાગે છે.
****