ક્ષેમકુશળ વાંચજો,
એમ કાગળ વાંચજો,
છે ગડી જેવી પીડા,
પત્રની સળ વાંચજો.
જો લખું હું ઝાંઝવા,
તો તમે છળ વાંચજો.
છો તમે દરિયો, ભલે!
વાવનું તળ વાંચજો.
જ્યાં કલમ ભાંગી પડી,
ત્યાંથી આગળ વાંચજો.
અક્ષરો રેલાય ત્યાં….
આંખનુ જળ વાંચજો.
~ હર્ષા દવે
પત્રનો જમાનો ગયો પણ ભાવના સલામત છે. સ્વરૂપ બદલાય છે, રસમ બદલાય છે, બસ. જે નથી લખાયું કે નથી લખી શકાયું એ વાંચવાની અરજ સાવ ઓછા શબ્દોમાં અને છતાંય ચોટદાર રીતે કહેવાઈ છે. જાનદાર ગઝલ.