🌸
*ત્રુઠા… ત્રુઠા*
વિચારને વલોવી કરે પ્રયત્ન જૂઠા
એ તીર હોય તો પણ છે જન્મજાત બૂઠાં
જરાક ઝીણવટથી તું કાન માંડી જો, તો
તનેય સંભળાશે બબડતાં બેઉં પૂઠાં
જગત છે કાચનું ઘર, સૌ ચીજ કાચની આ-
છે પોત તારું – મારું ય કાચ મુઠ્ઠેમૂઠા
હો પાંખની પ્રતીતિ ‘ને આભ માટે ઝંખા
હું શોધવાને આવ્યો છું પંખી એ અનૂઠાં
સ્વભાવગત્ ફકીરી મિજાજનો મહોત્સવ
એ રેવડી ય પામીને બોલે ત્રુઠા… ત્રુઠા
~ સંજુ વાળા
ચાહે કવિતા કે બીજું કશુંય… જ્યારે સહજ ન હોય ત્યારે એ કૃત્રિમતા બુઠા તીર જેવી બની રહે છે…. બસ આ વિચારથી આ મિજાજથી ગઝલ શરૂ થાય છે ને ઉત્તમ શેરની હાર ઉતરે છે…. ભાવક ત્રુઠા ત્રુઠા ….