🌸
*કૂવાને પોંખવા*
વૃક્ષો સમા વિહંગના ઉમળકાને પોંખવા,
નભ દોરીને ઊભો છું હું ટહુકાને પોંખવા.
ઝાકળ બની વરસવું પડે છે સવારના,
સૂરજ સમા ઉજાસમાં તરણાને પોંખવા.
વહેલી સવારે જળથી ભરી પંચ પાત્રને,
પૂજા કરું નદી અને ઝરણાને પોંખવા.
સ્કૂલે જતાં શિશુને હસાવું ફળો ધરી,
વ્હેલી સવારના કૂણા તડકાને પોંખવા.
લોકો ભલે ભરે નહિ પાણીની ડોલ પણ,
હું તો ભરું અવાવરુ કૂવાને પોંખવા.
~ દર્શક આચાર્ય
માત્ર તરણાંને જ પોંખવાના નથી, અવાવરુ કૂવાઓ જળ સમેત પણ રાહ જુએ છે, પોંખાવાની….