*હૂંફાળો મળે*
જિંદગીનો એ રીતે બસ અર્થ મર્માળો મળે
કે શિયાળો પણ મળે તો ખૂબ હૂંફાળો મળે !
કોયલોને બાગમાં જો મહેકતો માળો મળે
વૃક્ષની હર ડાળ પર ટહુકાનો સરવાળો મળે !
સ્નેહભીનો કોઇનો જો સ્પર્શ સુંવાળો મળે
ભર ઉનાળે વિસ્તરેલો કોઇ ગરમાળો મળે !
એક આખું આયખું કોરાં રહી જીવી ગયાં
આંખની ભીનાશમાં એ વાતનો તાળો મળે !
હાથમાં મારાં તમારી આ હથેળી લઉં અને
ધોમધખતા રણ વચાળે દ્વિપ હરિયાળો મળે !!
~ દિવ્યા રાજેશ મોદી