🔆સંજુ વાળા ~ તમાશાને મોકલ્યાં🔆

તમાશાને મોકલ્યાં રે તેડાં
સપરમો દાડો જોઈ કરવાને બેઠા રે કવિતા
જોડી નામઠામ વગરના નેડા.
તમાશાને મોકલ્યાં રે તેડાં.

પેનમાં સુકાઈ ગઈ શાહીને મનાવવા
હાથ જોડી શાંતચિત્તે કરીએ આરાધના
ખીચોખીચ ઊભરાતા કોટિ કોટિ કાગળોના
પારને પમાય એવી કઈ હશે સાધના?
તણખામાં દાવાનળ સમેટાય જાણું પણ
કેમ સંકેલાય કોઈ લંબાયેલા છેડા?
તમાશાને મોકલ્યાં રે તેડાં.

કાગારોળ કરી કરી ઢળી પડી જીભ અને
ઝૂરી ઝૂરી પાક્યાં પાંચે આંગળીનાં ટેરવાં
બાવડાં તો દીધાં પણ બળ એમાં પૂર્યાં નહીં
સામે તાણ ચડતા ભીનારા કેમ ઝેરવા?
કોને જઈ પૂછીએ ને કાઢીએ પિછાણ ક્યાં?
કેટલે પહોચાડે કોઈ નકશાના કેડા?
તમાશાને મોકલ્યાં રે તેડાં

~ સંજુ વાળા

‘તમાશાને તેડાં ન હોય’ આ રૂઢિપ્રયોગનો કવિતાની ધ્રુવપંક્તિ તરીકે કેવો સરસ મજાનો પ્રયોગ!

કવિતા રચવી છે? તો શું કરી શકાય એ કવિ આ કાવ્યમાં કહે છે તો સાથે સાથે ગમેતેમ છેડા સાથે ચેડાં કરીને કશુંય રચવાનો પ્રયત્ન એ ‘તમાશાને તેડાં કરવા’ જેવી પ્રવૃત્તિ બની રહે !!

વાહ કવિ !

🥀વિશેષ : દિપક સોલંકી ‘રહીશ’, ગણપત પરમાર કવિ🥀 

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏

ઘર