🔆કવિ સંજુ વાળાને પારસચંદ્રક🔆

🥀 🥀

કવિ સંજુ વાળાને પારસ ફાઉન્ડેશન તરફથી ગુજરાતના રાજ્યપાલશ્રીના હસ્તે ‘પારસ ચંદ્રક’ (3.6.2026)

‘કાવ્યવિશ્વ’ તરફથી કવિને અનેકાનેક અભિનંદન, વંદન.

પ્રવાહમય છે સમય, આવશે—જશે, જોજે!
પ્રતીતિરૂપે દીવાલોય ઝૂમશે, જોજે!

કળીની જેમ એ હસ્તી ઉઘાડશે, જોજે!
પછીથી એમાં તને તું જ ભાળશે, જોજે!

કદી એ સ્થિતિએ તું મીટ માંડશે, જોજે!
જ્યાં આપમેળે બધું ગાશે—વાગશે, જોજે!

સરળતાથી જ બધે એ હા—ના નથી કહેતાં
જવાબ દેશે તે પહેલાં થકાવશે, જોજે!

પિયાવો રામ-રસાયણનો માંડી બેઠા છે
તું ત્યાં જશે તો જરૂર પિવડાવશે, જોજે!

અસર ને આડઅસર જાણી પાડજે અક્ષર
નહીં તો એ જ તને બહુ ડરાવશે, જોજે!

પ્રતીકો—કલ્પનોનાં જાળાં ક્યાં જરૂરી છે?
ગઝલ તો ભાવ—ભૂખી છે, નચાવશે, જોજે!

~ સંજુ વાળા

બે અક્ષરનો રદ્દીફ દરેક શેરને પ્રતીતિકર બનાવે છે. ‘બોલચાલનો આ શબ્દ ‘જોજે!’ કોઈ ચોક્કસ બાબત કે વ્યક્તિ પ્રત્યે માનવીમાં રહેલી શ્રદ્ધા, વિશ્વાસને પ્રતિબિંબિત કરે છે.

આ ‘જોજે’ નિષ્ફળ જાય તો એ કહેનારાને તોડી નાખી શકે એટલો બળવાના !

‘સમય’ પર શ્રદ્ધા છે તો જે કળીને ખીલવે છે એ તો અસીમ! એ જ સમય આવે ત્યારે સઘળું આપમેળે ગાય એવું બને ! આવી અનેક ગમે એવી વાતો અને અંતે કવિને ય શીખ… કવિતા પણ સહેલાઇથી આવતી નથી…. પણ ભાવ હશે તો જરૂર આવશે જોજે !

🥀વિશેષ : દિપક સોલંકી ‘રહીશ’, ગણપત પરમાર કવિ🥀 

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏 

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏