🔆ભાવના સોનૈયા ~ જાગી ગયાં🔆 -

*ન્યાલ થઈ ગયાં*

જાગી ગયાં લગાર પછી ન્યાલ થઈ ગયાં,
છૂટી ગયાં હુંકાર પછી ન્યાલ થઈ ગયાં.

હાંફી જવાયું દોટ લગાવીને આંધળી,
બેઠાં ત્યજી પ્રયાસ પછી ન્યાલ થઈ ગયાં.

રાખ્યો નથી લગાવ અને ના અભાવ પણ,
છોડ્યાં બધા હિસાબ પછી ન્યાલ થઈ ગયાં.

વળવું ઘણું કઠિન હતું માર્ગ બ્રહ્મને,
ઠોકર મળી જરાક પછી ન્યાલ થઈ ગયાં.

ખૂટ્યું હતું દિવેલ ફક્ત, આશ તો હતી,
ને ત્યાં થયું પ્રભાત પછી ન્યાલ થઈ ગયાં.

~ ભાવના સોનૈયા ‘પ્રિયજન’

ન્યાલ થવાની ચાવી બધાને મળતી નથી અને જેને મળે છે એનેય ક્યારેક હાથમાં આવે છે, પછી છટકી જતાં વાર નથી લાગતી. પેલા આગિયાને પકડવા જેવી વાત છે, હાથમાં આવે આવે ને છૂટી જાય ! આ એક એવું તત્ત્વ છે જે સાંપડવું મુશ્કેલ અને સાચવવું એથીયે મુશ્કેલ. સ્વયંને જાણવાની આગ જો વહેલી લાગી હોય તો આવું કશુંક, ક્યારેક અનુભવાય બાકી જન્મારો જલનમાં જ જવાનો એ નક્કી !

રદ્દીફ સરસ છે અને આખી ગઝલમાં સાદ્યંત સચવાયો છે. ભાવ મજાનો છે, કાફિયાની નરમી ભૂલી જઈ શકાય !

‘કાવ્યવિશ્વ’ તરફથી કવયિત્રી ભાવના સોનૈયાને એમના પ્રથમ ગઝલસંગ્રહ માટે અઢળક અભિનંદન.

ભાવના સોનૈયા ‘પ્રિયજન’ * શબ્દનો તરાપો લઈને (ગઝલસંગ્રહમાંથી) * રન્નાદે 2026

🌸દિન વિશેષ : દર્શિની દાદાવાળા, ગૌરાંગ દિવેટિયા, બૃંદા ઠક્કર, ઉદય પાલનપુરી🌸

🙏આપને ગઝલ, ગીત, અછાંદસ વગેરે કાવ્યસ્વરૂપો વિશે જાણવામાં રસ છે? જુઓ વિભાગ ‘સ્વરૂપ’. મોબાઇલના ઉપરના જમણે ખૂણે આવેલી આડી ત્રણ લાઇન ટચ કરો અને ખુલશે વિભાગો. 🙏

🙏આપની પસંદના કવિ કોણ છે? ‘Search’માં એમનું નામ લખો! અને વાંચો એમની કવિતાઓ. એમાં આપ પોતે પણ હોઈ શકો.🙏