દાન વાઘેલા ~ માનવતાની હોળી Dan Vaghela
માનવતાની હોળી થઈ ગઈ;
ભૂખ ભટકતી ઝોળી થઈ ગઈ!
ક્યાંક ખુવારી, ખુદ્દારીથી –
પગદંડી સૌ પ્હોળી થઈ ગઈ!
ધોમ ધખેલા રસ્તા ઉપર –
આંખો લાલહિંગોળી થઈ ગઈ!
લાખ્ખો કરોડ વચન સુણ્યાં તો –
કેરી પણ લીંબોળી થઈ ગઈ!
ઈશ્વર – અલ્લા, ગલ્લા – તલ્લા;
સત્તા પણ નઘરોળી થઈ ગઈ!
‘દાન’ ભરોસો પંડ ઉપર પણ –
ચિંતા વડવાગોળી થઈ ગઈ!
~ દાન વાઘેલા
સૌજન્ય : સાહિત્યસેતુ જર્નલ
OP 19.12.2020
વાહ વાહ! દાનભાઈ…સરસ ગઝલ માટે ધન્યવાદ.તમે ટુંકી બહેરમાં મોટી વાત કરી છે.તમારો આક્રોશ સમયના સંદર્ભમાં પ્રત્યેક શેરમાં પામી શકાય છે.
વાહહહ
સુંદર રચના