જિજ્ઞા ત્રિવેદી – લઇ નમક Jigna Trivedi

લઇ નમક જેવા સ્મરણ અડશો નહીં,

ઝખ્મ છે તાજા અરે ખણશો નહીં.

આગમાં હોમાય છે ઘી એ રીતે,

સ્વપ્ન હોમે કોઈ તો બળશો નહીં.

આમ જો સંતાઇ જાશો જાતથી,

તો પછી ખુદનેય તે જડશો નહીં.

છે બહારોએ દીધાં સોગંધ કે –

તાજગીના પર્ણ છો, ખરશો નહીં.

કોઈ આવીને સતત હોવાપણું –

ઘૂમરાવે તોય ખળભળશો નહીં.

જાળવી બેલેન્સ થોડું ના શકો,

એટલા ઊંચે કદી ચડશો નહીં.

સૂર્યએ નોટિસ કાઢીને કહ્યું –                                                                                  

કે સમય પ્હેલા કદી ઢળશો નહીં.

ઝૂકવાનો અર્થ ના સમજી શકે,

એમની સામે કદી નમશો નહીં.

~ જિજ્ઞા ત્રિવેદી

ત્રીજા અને ચોથા શેરમાં આત્મવિશ્વાસ જાળવવાની વાત સરસ રીતે આવી છે.  પાંચમો અને સાતમો શેર એ જ વાતને દૃઢાવે છે. સરસ ગઝલ