ત્રિભુવનદાસ ગૌરીશંકર વ્યાસ ~ ખિસકોલી
તું અહીંયાં રમવા આવ મઝાની ખિસકોલી
તું દોડ તને દઉ દાવ મઝાની ખિસકોલી
તું કેવી હસે ને રમે મઝાની ખિસકોલી
તારા કૂદકા તો બહુ ગમે મઝાની ખિસકોલી
તું જ્યારે ખિલખિલ ગાય મઝાની ખિસકોલી
તારી પૂંછડી ઊંચી થાય મઝાની ખિસકોલી
તારે અંગે સુંદર પટા મઝાની ખિસકોલી
તારી ખાવાની શી છટા મઝાની ખિસકોલી
તું ઝાડે ઝાડે ચડે મઝાની ખિસકોલી
કહે કેવી મઝા ત્યાં પડે મઝાની ખિસકોલી
બહુ ચંચળ તારી જાત મઝાની ખિસકોલી
તું ઉંદરભાઇની નાત મઝાની ખિસકોલી
તું અહીંયાં રમવા આવ મઝાની ખિસકોલી
તું દોડ તને દઉ દાવ મઝાની ખિસકોલી
~ ત્રિભુવનદાસ ગૌરીશંકર વ્યાસ
બાળગીતો વાંચવામાં સહેલા લાગે, લખવા જરાય સહેલા નથી. એ માટે બાળમાનસની ઊંડી જાણકારી જોઈએ. બાળકને શું ગમશે, કેવું ગમશે, કેવી રીતે ગમશે ? આ બધાની સમજ હોવી જોઈએ એટલું જ નહીં, એ પચાવેલું હોવું જોઈએ. કવિ ત્રિભુવન વ્યાસના બાળગીતો વાંચીને, ગાઈને એક આખી પેઢી મોટી થઈ છે. એ જીભે નહીં, હૈયે વસેલા છે કેમ કે એમાં માત્ર જાણકારી નહીં, આનંદ પણ છે. અહીંયા જુઓ ખિસકોલી વિશે કવિએ કેટલી સરસ માહિતી બાળસુલભ આનંદ સાથે પીરસી છે ! કોઈએ આ ગીત સરસ ગાયું છે પણ ગાયિકાનું નામ ન મળ્યું.
ગઇકાલે કવિનો જન્મદિવસ એમના બાળગીતો અને સ્મૃતિવંદના સાથે….
ફોટો સૌજન્ય : કવિ ડો. વિવેક ટેલર
OP 23.5.22
*****
વિવેક મનહર ટેલર
25-05-2022
મસ્ત મજાનું ગીત… બાળપણની ગલીઓમાં ફરીને લટાર મારવાની મજા આવી ગઈ…
આભાર.
છબીલભાઈ ત્રિવેદી
22-05-2022
સરસ બાળગીત.
પ્રતિભાવો