કુણાલ શાહ ~ સપાટીની સાથે * Kunal Shah
સપાટીની સાથે
સપાટીની સાથે એ પાતાળ રાખે,
રહી મૌન ભીતરને વાચાળ રાખે.
સમંદર, ખલાસી, હલેસા ને હોડી,
પરસ્પર અનાયાસ સંભાળ રાખે.
પ્રકટ જે કરે તે શિકારી બને છે.
છુપાવીને મનમાં બધા જાળ રાખે.
રહે તંગ વાતાવરણ આ નગરનું,
સતત કાળજી એ રખેવાળ રાખે.
કરામતને આંબી ગઈ છે સહજતા,
પછી ઓલિયો શાને જંજાળ રાખે?
કથામાં ડુબાડી શરતને ભુલાવે,
હુનર બહુ મજાનું એ વેતાળ રાખે.
~ કુણાલ શાહ
પ્રથમ શેરની બીજી પંક્તિ ‘રહી મૌન ભીતરને વાચાળ રાખે’ની અર્થસભરતા તથા ત્રીજા અને પાંચમા શેરમાં રહેલ વ્યંગ્ય સ્પર્શી જાય એવા છે. છેલ્લા શેરમાં પણ આ નકલી સંતો જ નિશાન બન્યા છે. વાહ!
OP 28.9.22
***
સાજ મેવાડા
29-09-2022
વારંવાર વાંચી માણવા જેવી અર્થ સભર ગઝલ.
છબીલભાઈ ત્રિવેદી
28-09-2022
વાહ ખુબ સાચી વાત કરી છે કવિ ને કોઈ ની સાડીબાર હોતી નથી ખુબ સરસ શેર ખુબ ગમ્યા આભાર લતાબેન
ઉમેશ જોષી
28-09-2022
કુણાલ શાહની ગઝલના સકળ શેરની સુઘડતા મનને સ્પર્શી જાય છે….
અભિનંદન.
Avval Sadikot
28-09-2022
વાહ..દરેક શેર દાદ માંગે એવા..અતિ સુંદર…
પ્રતિભાવો