સુરેશ દલાલ ~ આપણી રીતે * Suresh Dalal
આપણે આપણી રીતે રહેવું
ખડક થવું હોય તો ખડક
નહીં તો નદી જેમ નિરાંતે વહેવું !
ફૂલની જેવું ખૂલવું
અને ડાળની ઉપર ઝૂલવું,
ભમરાનું ગીત કાનમાં આંજી
કાંટાનું રુપ ભૂલવું.
મૂંગા થઈને સહેવું અને કહેવું હોય
તો પંખીની જેમ કહેવું !
ખડક થવું હોય તો ખડક :
નહીં તો નદી જેમ નિરાંતે વહેવું !
પગલાં ભૂસી ચાલતા થવું
પંથની ઉપર મ્હાલતા જવું
આનંદ આનંદ વેરતાં વેરતાં
આનંદને પંપાળતા જવું
લેવુંદેવું કાંઈ કશું નહીં : કેવળ હોવું :
એ જ તો રહેવું :
ખડક થવું હોય તો ખડક:
નહીં તો નદી જેમ નિરાંતે વહેવું!
~ સુરેશ દલાલ
ખૂબ જ સરસ સકારાત્મક વિચારો આ ગીતમાં અનુભવાય છે.
ખડક થવું હોય તો ખડક નહીં to નદી જેવા થવું…..lovely