ઉમેશ ઉપાધ્યાય ~ પળ લઈને Umesh Upadhyay

એક વીતી ચૂકેલી પળ લઈને
ક્યાં જવું આંખ આ સજળ લઈને.

રાહ જોઉં છું હમસફરની કો’
આવી જા ચાલવાનું બળ લઈને.

કૂચ આદરતો રહું સમય સામે,
રોજ તારાં સ્મરણનું દળ લઈને.

આજ કહી દીધું ગઝલથી ખાસ્સું,
શબ્દનું છાનું પીઠબળ લઈને.

બાળપણ વાવીને આવ્યો છું ત્યાં,
હુંય ખેતર ગયો તો હળ લઈને.

~ ઉમેશ ઉપાધ્યાય

ગઝલક્ષેત્રે આજે ઘણી કલમો સક્રિય છે. ઘણી કલમોમાં તેજ પણ છે. કવિતાની દિશા પકડનારા તરત ગઝલ તરફ જ આકર્ષાય છે અને કલમ માંડે છે…. મંચ પર એનું સામ્રાજ્ય વધતું જાય છે એ કારણે?

આનંદ છે કે કવિ ઉમેશ ઉપાધ્યાય અછાંદસ પણ લખે છે. એમની આ ગઝલમાં મને છેલ્લો શેર વિશેષ ગમ્યો. તમને?